失敗國家?近過你樓下間些粉

何謂「失敗國家」?唔駛用劍嘅,睇下港共政權就知,感恩林奠班子剛愎自用扮工,武漢化武已經成功進駐香港各大小社區,「人心惶惶」呢個成語已經唔再係紙上知識,你是但落求其一條有藥妝店超市嘅街望下就能睇直播,無論黑店抑或良心店,來貨係 condom咁薄定係正常貨色,例必幾千人通宵排隊買口罩,超市廁紙及米城牆畀人來瘋搶哂,買藥買清潔用品買口罩防疫都情有可原,掃廁紙抗肺炎?我寫出嚟都覺得莫名奇妙,莫非真係廁紙包頭能醫百病乎?

武漢生化武器行勻全世界固然係終囯式人禍,香港由原本可以臨崖勒馬置身事外,演變成今時今日每幢樓都隨時係死亡陷阱,當然也是林奠獨特嘅攬炒人禍,外國勢力標普穆迪之類由舊年尾開始已經開始調低香港主權評級,愚以為實在太厚道,美帝彭博日前一文評論「香港是否已是呈『失敗國家』跡象?」老老實實,都唔係「已呈」啦係咪?是但一位香港人每朝早瞓醒 loop 手機新聞 popup,都會覺得呢個失敗國家日日都奇過蒙太奇。

是日我最期待嘅畫面出現了.jpg,終於有人械劫⋯⋯廁紙,香港地一街金鋪一巷珠寶店,而家人癲志短,做賊都算啦,有錢唔搶,竟然係偷廁紙,三個賊搶市值二千蚊嘅六百卷廁紙,事後係咪每人留五卷自用,盜亦有道,585卷廁紙賣十蚊一卷,收返$5,850港幣,之後每位賊大哥分返$1,950?定還是係有廁紙有高潮,落老蘭溝女而家係帶廁紙口罩當 Mask & Tissue Coin,六百卷廁紙擺明係土豪褲二袋啦,成條蘭桂坊啲女畀佢三傻溝哂啦。

一個垃圾不堪嘅賣港賊政權,所謂建制制度,竟然係一隻乜撚嘢都唔識嘅老虔婆指下個鼻就算數,政治大於專業及科學,你寒窗苦讀廿年公共衛生專業經驗權威,都唔夠行騙長官一言九億頂,呢個就係終共國殖民政權嘅世界級表演 —— 好歹都叫曾經掹車邊第一世界契弟嘅香港人,竟然淪落到要為公共衛生最基本需要而堪坷甚至鋌而走險。

港共政權已經猶無人駕駛,英國人留低再多嘅英殖遺產也好,敗家仔敗下敗下敗到一罩難求,然後成班日薪幾十萬嘅賣笑班子聳聳肩攤開手,扮下人肉emoji又一日,如此肉酸小丑竟然獨裁救港大事,牠們咁都成功才是冇天理呢。

「失敗國家」真係好廉價,大家望出窗口就係了。